美國聯儲局歷時六年QE曲終人散，熱錢不再四圍走。許多「末日論」派嘅投資巨頭建議買入黃金，不過好似聯儲局前主席格林斯潘咁重量級嘅大人物，叫大手買入黃金就好少見。
格老上星期喺新奧爾良一個論壇，被問點解央行仲儲咁多金，格老一反常態大方剖析對金價睇法。佢話黃金價值唔受政府推行政策影響，而且唔需要其他擔保就被接納。格老又押注金價五年後越升越有，終歸美國通脹上升，帶挈金價造好。
格林斯潘喺呢嗰時期提出買金論，令市場十分意外。因為格林斯潘喺1987至2006年期間做聯儲局主席，出晒名唔向傳媒透露半句，又話當時聯儲局聲明係玩語言藝術，就係唔想市場對未來政策反應過激。但到今時今日，佢竟然破格叫買金，大家都好想知道究竟係危言聳聽定混淆視聽。
上星期五日本央行突然宣佈量寬加碼，觸發資金持續流入美元。在美元轉強下，金價被質低，最低曾見每盎斯1,174美元，是近四星期低位。
投資者亦可以黃金ETF持倉變化，掌握更多金價走勢。截至上星期四，黃金ETF SPDR持倉量變化不大，總黃金持倉量為742噸。另外，投資者要留意美國經濟數據，慎防被大量沽盤殺個措手不及。
C+B
本欄逢周一刊出