有時啲嘢真係唔好唔信邪，巴塞喺季初順風順水，頭8場聯賽7勝1和一球都冇失過，但最近兩場波等到新兵蘇亞雷斯停賽期滿，點知近兩場西甲喺阿蘇都正選上陣情況下，反而全部輸晒，上周六主場迎戰切爾達爆大冷以0:1輸波，喺積分榜仲俾死對頭皇家馬德里過埋頭，榜首都冇埋。
巴塞今季高價收購蘇亞雷斯加盟，一心諗住佢加埋美斯同尼馬呢個南美天王組合夠煞食，點知如意算盤打唔響，近兩場聯賽輸晒兼只入1球。喺上周六場聯賽之前，巴塞今季所有主場賽事全勝，點知就俾切爾達打破金身，客軍由拉里維喺55分鐘建功奠勝。
4次中楣輸畀切爾達
巴塞輸波其實都係有啲唔夠運，全場19次射門兼有4次中門楣，教練安歷基都好無奈：「今場波我哋有好多地方都有需要改善，不過大家喺比賽嘅爭勝鬥心唔需要去懷疑，只係個波好似硬係唔想入網咁。」連續兩場波用南美三叉戟都輸，安歷基就回應：「大家唔好將注意力集中喺呢3個球員身上，應該整體咁去睇。我哋會研究吓情況，去搵出問題再解決。」
喺1星期前巴塞輸畀皇馬之後，有烏拉圭傳媒怒轟美斯，指摘佢喺場波期間一次都冇交波畀蘇亞雷斯，如果兩大天王合作真係有問題就大件事，想當年天價加盟嘅伊巴謙莫域，都係踢咗1年貨仔就黯然走人，有傳聞當時美斯唔妥伊巴，要哥迪奧拿踢走佢。另外，安歷基喺今場波棄用一直受到好多批評嘅碧基，後者冇傷冇病，但着住西裝喺看台睇波，仲提早離開。
皇馬大勝格軍領群雄
呢邊廂巴塞近況唔掂，但嗰邊死敵皇馬就繼續勢如破竹。皇馬喺上周六西甲作客CF格蘭納達，基斯坦奴朗拿度（C朗）喺西盃賽事休息之後，復出即刻入波，開賽兩分鐘就建功，助皇馬以4:0大勝，聯賽7連勝，喺周日西甲賽事未踢之前暫時升上榜首。C朗喺10輪聯賽入17球，又刷新西甲新紀錄。
識睇，一定係睇足英台【英波Live】：
http://soccer.appledaily.com
http://bit.ly/engballlive