醜婦終須見家翁！上周五見報至話日本加消費稅自亂陣腳，勢估唔到央行行長黑田東彥當日搞「零息革命」，令沽yen再遍地開花，115日圓跌兌1美元不再是夢，部署「佔領東瀛」的遊日港人有福了。
日本4月將消費稅由5%大幅加至8%，外界早已憂慮呢個托大的舉動等如拔苗助長，年尾隨時要加碼量寬撐經濟，結果第二季經濟勁縮7.1%五年最差。但日本政府好似董伯伯盲撐梁特咁粉飾太平，一直堅稱復蘇無難度，外界見佢咁硬膠，對今年再放水已不存幻想，那估得到央行轉軚快過打針。
有趣的是，聯儲局上周議息聲明雖被外界視為有鷹派手影，但市場普遍認為，在美國和日本貨幣政策今年難有實質舉動情況下，美元兌日圓今年止步於110算。
兌美元見115不是夢
不過，瑞典央行上周三突然降至零息後，日本央行兩日後出其不意擴大基礎貨幣規模至每年80萬億日圓，令美國經濟風景獨好的情況更加顯眼，加上日央行的行動勢加重歐洲央行的放水壓力，美元得寵指數有望升呢。日圓上周五單日急插2.8%，美元由109衝上112.49高位，相比10月15日低位的105算波幅達700點子，技術上未必值博。不過，日央行上周零息革命的震驚程度，拍得住港府9月28日施放催淚彈，淡友恐怕會像佔中般遍地開花，睇怕日圓唔跌到115算，淡友未必肯收手。
奇兵
本欄逢周一刊出