財爺曾俊華呢兩個星期驛馬星動兼且好頻撲,上星期臨時臨急接替狼英,飛去歐洲出席貿發局嘅招商活動,周六日頭返到香港,聞說佢只係忽然醒起美酒佳餚巡禮就快完場,先至決定當晚走去行番轉,噚日佢又畀面梁錦松出席小母牛活動,今日下午就會同金管局總裁陳德霖、財經事務及庫務局局長陳家強上京嘞。
家陣成個孖屐都等緊滬港通開車,財爺喺呢個時候同埋陳德霖與陳家強上京,畀咗好多人希望㗎。
即使佢哋呢次上京,只係每年嘅慣性活動,三位每年都喺呢個時間北上拜會中證監、銀監會、商務部、人民銀行同國務院港澳事務辦公室嘅官員,講講最新金融狀況,今年嘅分別在於,中央似乎因為佔中而推遲滬港通開車時間,佢哋三位財金官員北上探吓口風,星期三回港時,點都應該有多啲聲氣話畀孖屐知卦。