第六場告東尼馬房的「尊兄」配巫斯義建功，力壓雷神嘅「君悅灣」，兩駒鬥得好精彩，雖然只係普通賽事，但就好有觀賞價值。
「尊兄」今季第二次贏田草1600米，收穫豐富，除了馬主兼馬會前副主席周湛燊開開心心拉頭馬外，喺凱旋門還出現一位傳奇人物，就係前練馬師陳毓麟，89歲嘅陳毓麟綽號「飛機陳」，年輕時就讀於羅便臣道華仁書院，後來去打仗，成為空軍一員，並獲送去印度及美國受訓，能駕駛野馬戰鬥機，編於南京戰隊。戰後返香港任職怡和屬下出入口公司。不久在香港做業餘騎師，掛靴後辭去出入口公司文職，受訓成為練馬師，1979年更登上冠軍練馬師榮銜，1990年轉往澳門練馬，至1995年完全退休，如今89歲仲鬼打都冇咁精神，果然係打仗出身。
「尊兄」馬主周湛燊說:「『尊兄』大前仗贏馬後，近兩仗都遇到不利形勢，前仗跑沙田1800米搶口帶頭望空跑，沒有遮擋，形勢惡劣，上仗轉跑快活谷亦交不出水準，敗難作準，今仗回爭贏馬路程沙田1600米，路有根據，巫斯義走位亦佳，留前鬥後，成功發揮出該駒應有的水準，加上馬兒本身有進步，也是致勝關鍵。」