當唔少人睇到張融反佔中就感到好煩厭，高登仔就同大家嚟個社會實驗，整咗一張祝賀周融獲派任為駐英大使嘅簡體字banner，同埋一張寫住「支持周融長居英國」嘅橫額，測試反佔中人士有冇獨立思維。實驗結果係：唔少藍絲帶大叔兼大嬸，見到張融個名就滿心歡喜，完全唔理內容，舉完banner再簽埋名。莫非佢哋真係好想張融移民？
大叔大嬸幫手舉橫額
為咗證明唔少反佔中嘅大叔大嬸，民智未開兼未必有邏輯思考，係俾建制派歪論洗腦，有高登仔日前攞住以簡體字寫嘅「恭賀和平先驅周融同志獲指派任駐英大使」banner，去到唔少還路於民簽名街站。有份測試嘅巴打話藍絲友唔單止幫手舉banner，仲舉得好開心，甚至問佢可唔可以留低張banner，更有人相信張融會去英國，係咪盲反？可見一斑！
唔單止咁，有人仲同步仿照反佔中大聯盟嘅橫額，整咗張寫住「找數於民 恢復市容 長居英國」嘅，上面特登大大隻字寫住「支持周融簽名大行動」，仲擺埋街站做宣傳。唔知係咪怕太多人簽名呢？張融有份嘅幫港出聲，噚日喺fb鬧人哋抄襲喎。至於「被支持」移民嘅張融則聲稱唔介意被惡搞，高呼「香港是我家」！
李八方
mailto:[email protected]