雷神人逢喜事精神爽，頭場先幫徐廐「金瀛」開齋，第三場四班草地1200米再替蘇偉賢馬房「笑眼光」打開勝門，咁啱兩駒都係首次贏馬，雷神可謂交足功課。「笑眼光」今場季內初出由頭帶到尾，成為騎練今季首匹合作頭馬，二、三名分別係大熱門「英才」同後備補出馬「大家熊」。
眾所周知，「眼光」系馬支持咗蔡廐好耐，上季蘇偉賢開倉，馬主將「愛眼光」交畀佢訓練拎到一W兩P，彼此擦出火花。至於「笑眼光」一直養喺賢廐，上季出道跑咗兩場就歇暑，今仗復出用雷神，賽前試泥閘人馬攜手贏條街返嚟，出賽果然有料到，贏來有餘未盡，騎練今季首次喺沙田合作即勝，馬主譚榮根亦告季內首度揚威凱旋門。
譚榮根說：「『笑眼光』今季唔同咗，好似另一匹馬，成熟體重增加，大隻咗之外，情緒亦比前更為淡定，有好大進步。我對蘇偉賢表示千萬不要心急，寧願遲點出賽，操好才出，賽前試閘走勢不錯，我們都有少許信心。『笑眼光』應是1400、1600米馬。由於在泥地閘跑得好，或許日後進軍泥地也未定。」