大摩第六場搏輸「君悅灣」，畀阿巫隻「尊兄」擒咗，阿巫第七場三班1600米幫大摩贏番隻「星爾頓」補數。其中「星爾頓」換人加程取得在港第一W，亞軍係「電光火石」，大熱門「錦繡河山」姍姍來遲僅得第三。今日跑到第七場為止，大摩拎咗兩冠一亞一季，四隻上名馬共通點在於配搭同上仗唔同，「大家熊」由李富換咗田泰安，「步步威」同「君悅灣」分別由羅理雅改用田泰安同莫雷拉，「星爾頓」則由韋達易配巫斯義，再一次顯示大摩調兵遣將好成功。
與應屆馬王「威爾頓」同主之「星爾頓」，喺英國三戰三勝後運港，身價絕對唔平，上季出道至上賽為止卻連輸六場，今日增程初跑千六米兼首配阿巫，終於變出彩虹，後上一攻而破，來港後初次贏馬。
「星爾頓」馬主百億東莞首富鄭強輝沒有到場，由兒子前藝人、現已轉戰幕後的鄭家星主持大局。鄭家星說：「馬王『威爾頓』日前熱倒落第令我們失望，今次『星爾頓』出賽，我特意不去馬匹亮相圈，希望不要給予自己太大壓力，結果交出水準，令我十分開心。『星爾頓』來港後需要時間適應水土，今季馬身線條比上季更分明，大摩對牠有不俗評價，並部署向今季香港打吡大賽進發，希望取得入場劵。」
大摩說：「巫斯義已我表示卜定下次再騎『星爾頓』，牠將於六周後再跑，跑1600或1800米，牠有2000米長力，以今季打吡為目標。」