樂施會早前引用福布斯數字，指全球億萬富豪人數由2009年海嘯前嘅793人，增逾倍至今年3月嘅1,645人。其實除咗因為美國QE放水，淨係睇蘋果與facebook（fb）股價，就知過去幾年造就咗幾多有錢人喇。
先講蘋果，iPhone推出以來，蘋果2008年底至今股價大升9倍。著名投資者伊坎近年開始出手密密吸，早排先至晒命話，同佢一齊投資嘅人，連股息已經賺53%。伊坎至今持有約5,300萬股蘋果，相當於0.9%權益，呢度市值約57億美元。
至於2012年5月先上市嘅fb，雖然上市之後股價潛水一年先浮面，但之後升勢強勁，上市至今升近倍。創辦人朱克伯格身家都增至超過300億美元。但有錢人多咗，貧富懸殊亦嚴重咗，樂施會都係想大家關注呢個問題。