「萬人迷」碧咸雖然喺舊年5月掛咗靴，但係佢嘅吸金力一樣可以由球場延伸到商場，佢仲幾鍾意嚟亞洲掘金㖭喎。
碧咸今個星期六（8日）將會現身澳門，為金沙中國（1928）旗下「四季名店」購物商場嘅翻新同擴建完成作開幕嘉賓。碧咸對於澳門呢個地方應該唔會太陌生，舊年又係11月，佢已經旋風式到訪過金沙嘅威尼斯人，公佈同金沙有一系列合作計劃，後來仲索性做埋代言人，主力幫金沙宣傳餐飲、零售及休閒娛樂等方面。
近排澳門賭場生意麻麻地，賭收由增長變倒退，有機會喺今日公佈嘅10月賭收，更有可能按年跌兩成咁多。唔知以碧咸嘅魅力，可唔可以吸引到佢班內地粉絲專程過去見佢一面，順手賭番幾鋪，幫手搞旺個賭場呢？
碧咸幫到金沙吸到幾多金就仲未知，但碧咸自己嘅吸金力就相當勁，早排佢嘅肖像權公司Footwork Productions公佈業績，碧咸分到750萬英鎊（約9,300萬港元）花紅，即係每日賺成超過2萬英鎊（25萬港元）。