我人在台灣。昨日網上看香港《蘋果》頭版，說佔中三子、學聯、學民、泛民及公民團體，正醞釀由立法會議員辭職，引發變相公投，挑戰人大2017假普選方案。
咁都俾你哋諗到，真係唔想講粗口都唔得：「有冇搞乜錯呀！」
講古仔時間。
「欲為千金之裘而與狐謀其皮，欲具之少牢之珍而與羊謀其羞。言之卒，狐相率逃於重兵之下，羊相呼藏於深林之中。」
不慣文言文？冇問題，執一執佢。
「從前中國周朝時，有條儍佬想縫製一件好正好靚的狐狸皮草大褸。於是走去同狐狸群商量：『喂！狐狸哥哥仔，你哋身上啲皮同毛，真係好鬼正！可以割啲落嚟畀我做件大褸嗎？』」
「條周朝儍佬，又想食羊肉。於是走去同羊群講：『喂，羊羊哥哥仔，你哋身上啲羊肉真係好鬼好味道，可以割啲落嚟畀我打邊爐嗎？好正喎！』」
兩個結果一樣，狐狸群狂奔山區，羊群逃到樹林裏面。心裏大概都是這樣想：「條友係儍定係白癡㗎？」
與狐謀皮，與羊謀羞，是這樣結果。與虎謀皮呢？老虎一聽：「乜話！我畀啲虎皮你!?我畀條毛你啦！」跟住梗係先來幾下仰天虎嘯，然後一招餓虎擒儍佬，食到條友渣都冇啦！
古有儍佬，今香港有乜佬？仍不以史為鑑，想去與虎謀皮。既是志同道合，「風雨同路見真心，月缺一樣星星襯。」大家都是真普選的支持者，自己友，斯文啲。叫他們做好佬吧！
一班好佬走去自己搞議員辭職變相公投，意圖去否定人大假普選方案，真的是上策？不會吧！
先說萬一輸了：
即等於是說今年佔中三子搞的6.22，近百萬人投票支持佔中，學民9.29行動引發的幾十萬人參與的雨傘運動，原來只是南柯夢一場？原來都是虛浮的？原來我們只代表少數香港人意願？原來我們是沒有道德正當性的？原來我們都是偲嫣BB口中所說的「一小撮反中亂港的漢奸所為」？原來我們都是圍堵《蘋果》大媽橫額所說的「喪盡天良必遭天譴的走狗」？原來我們三十幾日但仍死守金鐘、旺角及銅鑼灣的學生及市民，夙夜匪懈，冇覺好瞓，原來不是熱血青年，而是戇鳩仔女？
好佬們，不要睇小共產黨及他的維穩費。你或許未真正見識過，我有。區區幾百萬元掟落嚟（真係有錢使得鬼推磨），新義安、和勝和、14K……，再加一，兩百位大媽阿嬸，再加五、六十部的士。真係，三、兩下手腳，就可以使到《蘋果》運送雞毛鴨血。要不是同事奮起護報，警察佈置得宜，堅守崗位，《蘋果》早早game over！而我，也早早去咗退休等賣鹹鴨蛋！
在幾百億幾千億的維穩費跟你死纏爛打，問心啦！你真的認為輸的機會只有萬分之一？你真的覺得今日嘅曼聯作客vs韋斯咸讓一球可以取勝？可以當埋底褲，可以賣埋老婆，瞓身賭一鋪？
好吧，算我們公投大比數贏了，贏九條街，贏7:0。咁又點呢？阿茂理你？阿平理你？阿英理你？阿娥理你？咪咁天真啦！好佬！
俗語話，好佬怕爛佬，爛佬怕潑婦。議員辭職公投，真係好佬先諗得出，幾經辛苦，有了好多民意支持，走去同爛佬（沒有指明是CY）講數，走去同潑婦（沒有指明是阿娥）求情，走去同老虎（指明是共產黨）謀皮！
好佬，咪玩啦！
葉一堅
mailto:[email protected]