濶別咗馬迷近四個月嘅孫廐短途馬「甜蜜蜜」，將會喺今期復出，隻馬上季喺同程1000米直路賽兩捷，一次本身不良於行下，仍可擊敗「帝聖好好 」，另一次則孭重磅力壓「秋月春風」建功，大家應該有印象。不過印象更深刻嘅應係嗰兩次贏馬後，馬主潘志遠嘅「蜜」友巨胸Monna都有出現拉頭馬。Monna林依錡有四分一德國血統，拍過《金雞SSS》等電影，佢同「甜蜜蜜」嘅德籍練馬師孫達志，可以話啱晒嘴型。
上月19號潘志遠隻團體馬「君子協定」勝出，潘生同Monna都冇出現，但呢期「甜蜜蜜」就唔同喇，畢竟係潘生自己個人名下，梗要同Monna一齊主持大局。隻馬埋門試大閘走勢唔錯，輕鬆得第二，只輸畀當銳惡馬「超凡夢想」，本身已準備就緒。睇番Monna最近轉咗個新髮型，27歲嘅佢越嚟越靚，真係索到冇朋友，仲有啲似黎姿，唔通換新Look就係為咗迎接佢嘅蜜友兼愛駒「甜蜜蜜」，希望一齊影番張靚靚頭馬相？