有時問自己，睇波其實為乜，係娛樂，係賭博，係感情，係習慣，係揾食，係陪人，係逃避，係發洩！每個人有每個人唔同嘅訴求，不一而足！
上個星期睇早場韋斯咸對曼城，心情幾特別，預咗輸先，等自己平靜少少。其實上屆對曼城4次都輸晒，已經輸慣，但心裏面一個暗角其實偷偷哋收埋咗少少妄想，近排槌仔個勢咁好，或者有機會偷雞呢！
結果係，雞已偷，Yeah！不過球場上我嘅快樂，就係你嘅悲哀，Sorry！有人問咩料呀，弱旅爆冷贏波，人生幾何呀！與其好高騖遠，點解唔踏實啲撐Big 4，咁生活咪就可以正正常常又贏一場！
對於呢類溫馨提示，其實我有認真諗過，然後發現原來鍾意韋斯咸，並唔係因為佢係韋斯咸，而係因為佢係一隊弱旅！如果有一日佢搖身一變做咗球壇班霸（講吓都得啩），我可能會唔再支持佢㖭！
點解？唔係話懶型或者係薄情，雖然對隻古怪主場棗紅色仍然會有感覺，但到時佢都唔需要我啦，大把人錫大把人跟！咁多一個又如何。弱旅身份由隨時爛得嘅雞蛋變咗做金雞的話，吸引嘅球迷應該都有所唔同，正如有啲Eason歌迷淨係鍾意聽佢早期嘅歌，星爺迷只會情迷佢嘅舊作一樣。
波，最吸引嘅地方，其實係爆冷。爆冷，即係我估唔到，即係以弱勝強，即係永不放棄，毋忘初衷，唔會隨便話認輸。
強隊質高力厚贏面高，好多時可以主宰比賽。但最精采嘅賽事，就係你以為會輸，以為大家頂唔住要放棄嘞，你竟然頂住，未吹雞完場你都仲頂住，頂住後場保持不失，頂住前場等入多粒！
如果有機會問吓全港最多球迷嘅兩支球隊fans，邊場波令你最自豪，我相信曼聯fans會答你係99年歐聯補時反勝拜仁嗰場，而利物浦呢就係05年歐聯對AC米蘭嘅連追3球！經典各有不同，但眉飛色舞嘅神情應該差不多。睇波最難忘嘅永遠係知其不可為而為嘅逆境波，而唔係未開波就已經贏咗嘅太公波。
唔好以為捧弱隊好蝕底，查實我哋享受到大衛戰勝哥利亞嘅滿足感，多過勁旅們好多，畀你炒10場都冇所謂，總之贏一舖勁嘅就乜都返晒嚟。街頭嘅弱旅們，未吹雞呀！
KEYMAN
節目主持