小時就讀傳統書蟲學校，個個都掛住測驗考試；體育，屬於閒科中嘅閒科，基本上冇人會唔合格，既然冇壓力，大家有興趣就打吓波，冇Mood或者想趕測驗考試，直情唔上堂自修，體育老師一定吹你唔脹。而當時嘅學生（即係我哋），當然會挑戰權威（即係老師），而體育老師相對權威較弱，所以好多花名同謠言都會牽涉到校園體育界，更甚者會窒阿sir同覺得佢哋份工好「他條」。
小弟亦有幸踎過注重體育嘅學校兩年，見識過有領導才能、有策略、文武兼備（中史專家喎，鄧肇堅中學剛榮休嘅何兆星老師）仲壓得場嘅老師，每年帶起成支排球隊南征北討，仲要兼做球員輔導，呢啲嘢無OT只有做到OD，無職升而校方又難以考核，但都有香港人默默咁做，只為教好下一代，做個唔係只識搵錢埋堆踩人上位嘅粉皮，係㗎呢啲嘢絕對冇「經濟貢獻」，但好多學生受益。
我見到特首非常尊重體育界人士，仁川殘疾亞運期間，當我見到劉德華走埋去同衝過終點嘅蘇樺偉拍吓膊頭，喂見佢唔止一次㗎喇，呢個特首真係堅有心，仲會支持學生，可能係咁，公民提名先至要否決，因為689真係怕輸畀劉華（連唱歌都係）。
多謝香港體育界咁多人出聲怒剷689（圖），其餘幾件只識黐得獎運動員影相嘅廢官，佢哋嘅沉默，同句「唔好意思」一樣咁核突。
梁栢堅
填詞人+彩池人