大摩馬房隻「綽力之城」上季有幾勁，相信大家都記憶猶新，佢喺香港先後贏得二級賽精英碗及三級賽華商會盃，3月底更遠征杜拜，勝出金莎軒錦標一級賽；但可能因此消耗太多，今季隻馬走晒樣，初出得第六已經麻麻啦，10月底衛冕精英碗失敗不特止，仲跑尾二過終點，馬主富公子凌基偉，唔多唔少感到失望。
以「綽力之城」家陣狀況，睇嚟仍未渡過低潮，短期內要變番上季咁勁唔容易。不過凌公子仍有機會拉頭馬，事關佢有隻團體馬「北非諜影」，將會喺今期上陣，「北非諜影」梗係冇「綽力之城」咁高質啦，不過上仗表現都過得去喎，喺泥地1200米得第五，熱身目的已達，今次跑1400米，正正係以往唯一贏馬路程。仲有樣嘢你未必知，「北非諜影」另一位馬主王延慶，將於日內嫁女，所以愛駒一定搏甩髀，希望喜上加喜囉！