佔領運動漸由高潮回落之際，忽然傳出消息，話教育局可能要檢討中學通識教育課程內容，據講前年反國教，今年搞佔中之後，政府有人注意到啲中學生可能係上通識課學政治批判太多，思想受影響，變成反政府（甚至反共），非常唔啱「國情」，故此要想辦法將通識課程減少政治成份。
學生豪係第一批DSE考生，今年已經係大學三年級生，即係話通識教育由2006/2007學年開始，金鐘、旺角之佔領學生幾乎全部係上過通識教育嘅，只有極少數（因大部份學生唔選修）上過中國歷史課程；唔駛教育官員研究，我地都知道絕大部份示威學生係受西方（通識教育）影響多過中國歷史觀影響，唔怪得政府派、建制派呢輪猛咁發放WhatsApp，引用外國文章指佔中係美國人在後策劃嘅，美國人別有用心。
如果話通識教育同學生「洗腦」，那只能怪責回歸後之特區政府官員及董特首，因為教育改革、課程改革不是英國人臨走埋下嘅地雷炸彈，而係特區政府諗出嚟嘅！想當初，教育局、教育署、教統會等有搞諮詢，左丁山忝在諮詢之列，因當時大家根本唔知通識教育有乜實質內容，左丁山反對之，並且同高官講：「德國中學有四科必修，就係德文、英文、數學與德國史，其餘選修，香港照抄就得啦，中學必修中文、英文、數學與中史，其餘選修就掂！香港回歸中國，冇理由香港學生唔讀中國歷史！」但高官不聽，話中史好悶，香港學生冇興趣讀，通識教育培養批判思維，唔駛死背書，先至係有香港前景。吳克儉做考評局主席嗰陣，仲講過香港通識教育好掂，到外國推介，外國人讚不絕口，話香港教育課程改革走在世界前端。
哦，到了今天，董先生、梁錦松、李國章、羅范椒芬等人策動嘅通識教育科要檢討？教協及學民實會同政府死過。真係早知今日何必當初咯。講番自己嗰筆，中學四年級時，一位梁老師兼教國文與中史，佢在國文科教到論語、孟子言論，中史教到漢武帝尊儒，於是出咗一條作文題目：「論漢武帝罷黜百家」，左丁山作咗三張原稿紙，梁老師給予甲級，用紅水筆寫下按言大讚，左丁山至今還有收藏。梁老師讚左丁山夠膽大駡董仲舒，批評佢從此斷絕中國自由學術思想也。讀中史，只要老師教得好，其實學到好多嘢！