【歡樂英超】廖偉雄（阿燦）當年於《笑星救地球》勁放笑彈，尤以飾演乜太教煮餸最為經典，當觀眾緬懷這搞笑角色足足20多年，燦神最近終以乜太造型重出江湖，為周日曼市打吡大戰，教煮一味「炒大鑊」！即使最近被無綫出信阻開騷，一於話之你係「乜」定「七」，燦神真金不怕洪爐火，喜劇細胞依然滿瀉！
今次乜太助手由小李換上小斌，同樣擦出火花笑料百出。《乜太與斌》今集圍繞曼市打吡大戰，乜太更預測賽事將火藥味濃，教大家整味「炒大鑊」。乜太介紹必備材料：「打吡戰最緊要梗係準備雞髀，而且要大大隻嘅！攞起隻雞髀仲要打吓佢，有咁大力得咁大力，咁先叫打吡㗎嘛！」
至於從旁協助的小斌錯漏百出，更搶了乜太經典對白「咁就為之very good嘞」，激得乜太怒氣沖沖：「very good你講㗎咩？搞清楚個身份先嘛，你係斌仔嚟咋，小李你都唔係喎，我小李個斌仔呀！」
「炒大鑊」其餘材料還包括司華力腸（大衛施華）、肺爛尼（費蘭尼）、馬達（桑馬達）、的士高（迪斯高）及粘米（占士米拿），乜太認為今場波黃牌唔會少，球證甚至會出埋紅牌，最後更將爆竹一併放落鑊一齊炒，寓意打吡戰必鬥餐勁兼火藥味濃。
最後當然唔少得「笑星拍板」，皆因小斌冇大冇細亂搶對白，乜太惟有出動拍板揮打斌仔屁股：「家陣你係主持定我係主持？我鍾意打你邊度都得！」57歲的燦神於明年1月，將再踏舞台演出《燦神回歸演笑會》，粉絲們記得撲定飛支持！
球壇最火辣消息與趣聞，盡在【足英台】：
http://soccer.appledaily.com