「剎那嘅風光不是永恒」，唔知毛里裘斯籍騎師田泰安，有冇聽過蔡楓華呢句說話呢？24歲嘅安仔可以話少年得志，上季來港發展，令人意外地贏咗50場咁多，喺騎師排第四相當高，曾夥拍「步步友」贏得二級賽主席錦標，真係要幾威有幾威。點知今季好似食錯藥咁，成績大跌Watt，跑咗個幾月，只憑「信眼光」、「好事必得」贏得兩Win，上季大力支持佢嘅大摩，更冇馬畀佢贏，可以話係重大打擊！
所謂沒有最黑，只有更黑，安仔嘅運勢低處未算低。就以今期嚟講，佢嘅「劍飛聲」無疑跑泥地1200米三戰得冠亞季各一路有專長，可惜今次升班對手增強之外，抽正大外檔真係進退兩難。仲有「信眼光」，近兩仗非冠即亞正值當起，但今次跑沙田1000米冇根據，排二檔跑直路賽亦好狼狽，絕對唔易發揮。
本來安仔有匹機會馬「紅衣前進」，公認質素高，晨課表現又好，試閘跑第一，點知忽然宣佈退出，換隻「大家熊」入嚟，雖然都係安仔騎，但實力差得遠，咁你話係咪黑到暈呢？