【本報訊】香脆雞批食足三代的鄧老伯；移民加國、專程來港送別的小學同學黃太；小小的街坊茶餐廳，還見證八十後準新人的愛情故事……昨日是深水埗榮發餐廳餅店的最後一天。這間屹立欽州街55年、以雞批和酥皮蛋撻聞名的老字號擠滿送別人潮。兩代經營、終因後繼無人結業，62歲的趙之民，說着紅了眼睛。
記者：呂麗嬋
早上11時，榮發門外，排上小小的人龍，盛惠14蚊兩個的香脆雞批，還有11蚊3個的酥皮蛋撻和老婆餅，統統新鮮出爐。「由佢阿爸嗰代幫襯到𠵱家，睇住佢大，聽日就冇得食，點可以唔嚟？」由乖孫扶着來到榮發的鄧伯如是說。滿面不捨的，還有移民加拿大、也已古稀的黃太，「小五識到𠵱家，數吓手指有50年，以前冇咩錢，幾個同學嚟到，伯母就會炒碟嘢出嚟，招呼我哋幾個」。
敍舊話當年，不單是上了年紀老街坊的專利，下月結婚的八十後準新人Leon和何小姐，也一早來到榮發。原來，小店見證了小倆口的愛情故事，「男友六年前創業，間舖就開正喺呢度附近，我哋由未拍拖到就嚟結婚，一日到黑喺度開餐，呢度，見證我哋由冇到有」。周三早上，他倆還冒昧情商趙之民讓他倆在小店拍結婚照。「知道佢哋唔做，好唔捨得，想留個紀念，但我知老闆好有性格，之前有電影公司問佢，想話借間舖嚟拍戲取景，佢都一口拒絕，冇諗過反而會答應我哋。」何說。不說話時生人勿近的趙之民，其實「鐵漢柔情」，街坊都說他「得個惡樣」，記者昨日就親身體驗小店滿瀉的街坊情，由代理茶餐廳柴米油鹽的「行街」，到長駐廚房的老夥計，幾個大男人，握着手不放，難捨難離。
「夥計仲老過我 係時候休息」
「始終咁多年，話冇唔捨得，一定係呃你，但做人要撇脫啲，你見我聽日關門，門口一張紙都冇貼出嚟就知，點諗到啲後生仔，將我哋唔做嘅消息放上網，搞到啲老街坊喺美國都打長途電話嚟，又有啲學生話要喺門口擺檔，叫街坊留言，搞到鬼咁婆媽」。問他退休後，少了大班老街坊會不會不習慣？這個外冷內熱的潮州怒漢竟然兩眼一紅。
「我30歲接手時，已經同自己講，60歲一定要退休，𠵱家拖咗兩年，等埋個仔都大學畢業，係時候享受人生，唔通做足一世咩」。趙之民有六兄弟姊妹，家中排行第四，老店早年前舖後居，一家八口擠住小閣樓。82年老父癌症去世，時年三十的他走馬接手，「嗰時連數簿都未見過，重新學起，日日做足15個鐘，廚房又多大佬，個個都係性格巨星，唔係你有錢就要幫你做嘢，要睇吓係咪同你啱嘴形」。
好在這個太子爺從沒架子，成功過渡，「我唔鍾意讀書，12歲已喺舖頭幫手，由樓面做到廚房，係真正紅褲子出身」。承父業裝修轉營，由簡單的老婆餅、紙包蛋糕，擴展至粉麵飯常餐，一做半世紀，「廚房啲夥計有啲仲老過我，係時候休息吓喇」。半世紀的老店，溫情落幕，他說功成身退，已無遺憾。
