Michael鄭俊偉馬房嘅「好好計」，冇耐前喺美國贏咗場泥地一級賽，嚟緊香港時間周日清晨，又會喺當地上陣，跑育馬者盃短途大賽。
除咗「好好計」，同日下午沙田賽事，Michael有隻「好腳頭」亦係機會馬，呢匹馬上季尾已經顯著進步，喺沙田1600米直路成支箭咁衝上嚟，內閃唔規矩之下，仍追入亞軍。唞暑後「好腳頭」更加成熟強壯，本月10號試大閘，又一次顯示強橫後勁，喺賴維銘胯下勝出；但本月24日再試閘，名次竟然大幅倒退得第七，莫非唔夠弗？梗唔係啦，嗰日根本詐儍扮慒，轉彎兜大圈，不知蝕咗幾多腳程，直路賴仔㩒住冇騎過咁滯，仍徐徐上前輸唔遠，狀態其實Fit到爆，名次較後只不過刻意遊馬河，唔想隻馬太多人注意啫，同時亦測試吓佢直路喺大外檔，有冇好似上季咁內閃，結果走得咁規矩，Michael可以放心搏殺啦！