英超今個星期焦點戲碼真係非曼市打吡莫屬。曼城今屆個頭開得其實唔錯，但近期就有些少回落，而紅魔擁躉就覺得球隊近排有復甦迹象，就算聽日作客亦有力一拼。呢場周日英超早場重頭戲曼城迎曼聯，早飛曼城贏波賠率熱到1.78倍，但個人覺得勝負各有隱憂，問起平哥，佢都話好難估輸贏，但同我諗法一樣，都話可能合演入球騷。
從數據分析，兩隊近6次對賽5場開「大」。曼聯多位球星狀態回勇，尹佩斯上周94分鐘入波，加上左閘勞基梳爾頻頻助攻，佢哋應該好大機會有波入。平哥同我交換完心得之後好心水清話，過去兩星期乘埋已經有2.38倍，今場入球「大」又有1.59倍，再乘埋佢開始有啲味道。我就話過埋呢口，飲茶唔少得你！
講開本地球圈消息，又有啲是非暗傳。話說某大球會因近期比賽成績未達預期，為咗調節一下，居然諗緊計唔放港隊班人去台北踢東錦外。消息散出後，主要對手球會嘅聰明人即時有反應，由於兩隊去完台北返到嚟即對賽，聰明人就想喺國際足協啲例入面，搵吓有冇可能喺對賽嗰時，禁止呢啲太公波逃兵上陣。
平哥聽我講完話：「咁都得？前後日子有幾日差距，傷嘅可以復原，攰嘅都有時間恢復，好難禁到囉。」
本地職業領隊
耳聽八方 專收好料
識睇，一定係睇足英台【英波Live】：
http://soccer.appledaily.com
http://bit.ly/engballlive