田北俊倒梁，瞬即俾阿爺褫奪全國政協委員資格，有個浙江省政協港澳台僑委員都好出位，就係季霆剛，建議直選提委會，話提委會組成仍有大量彈性，只要利用民間智慧同創意，佢認為可以打開更多民主之門。
呢位「紅人」指出，學生討價還價伎倆，從中央的角度而言，係「混吉」多於實際，要求見總理李克強更係天方夜譚，如果學聯周永康APEC期間去北京，只會火上加油，為免政改談判破局，佢自言樂於擔當醜人角色，拋出一啲中間方案畀學生、市民思考，「即使犧牲我區區一個政協來達至和睦結局都在所不惜」。季霆剛咁講，八方覺得言重了，佢經典行徑多的是，由公民黨過檔民建聯，都做過一次醜人啦。