曼城(圖)上星期爆冷不敵韋斯咸，已轉任評述員嘅前利物浦靚仔中場列納，就抽水話曼城患上「衞冕冠軍綜合症」，列納本身同「槌仔幫」有啲淵源，老父踢過亦教過韋斯咸，或者唔夠中立，但曼城球員爭勝心唔及得上季，又真係幾影響球隊。
創業難，守業更難，連紀律性極強嘅德國兵，拎完世界盃後都嚴重跌watt，就知要維持球員保持飢餓感唔易，曼城以往被批評球員只因為錢聚埋一齊，對球隊、城市歸屬感更加一般，球員錦標到手後，翌季往往難以維持，以曼城3年兩冠都係單跳路，今季衞冕路難行。
曼城陣容中，今季跌watt最勁就係耶耶托尼，當然呢位科特迪瓦中場上季孭起成條中場線咁滯，今夏又要踢世界盃，冇得唞下實在唔可以苛責。曼城即食嘅收購策略，坦白講新加盟球員好多都處於甚至過埋巔𥧌期，阿古路、大衛施華勉強叫做仲有得進步，其他仍能保持水準已經有貨交。
以往曼城勝在有錢，呢批球員冇態、老化還是唔啱用？冇問題，大把錢可以買過批，羅賓奴、巴洛迪利、艾迪巴約都係呢個政策下嘅犧牲品，不過衰在犯咗歐洲足協公平條例，今季唔可以大花筒，新兵文加拉同費蘭度法蘭斯高又唔係領軍人物，更難提升士氣。
曼城領隊比歷連尼𠵱家最重要嘅工作就係從心理出發，起碼要教球員點樣重新出發；其實曼城咁有錢，應該請個心理專家幫吓手。
文：牽牛