個別分析員間唔中會放張相、整幅畫做報告封面，令人最有印象，算係「星級分析員」陸東以前喺瑞銀做分析員時，最鍾意喺自己份報告嘅封面放張龜相。里昂噚日出一份有關阿里巴巴嘅報告，封面畫咗一個着住超人衫嘅馬雲，條題係「馬雲如何擴展王國」，唔使睇內容，都知里昂呢份報告一定係唱好阿里喇。
里昂呢份報告劈頭就落足鞋油，指阿里係全球最大電子商貿平台，規模大過亞馬遜一倍，淘寶好成功，天貓將會係另一個引擎云云，講到尾，總之就係要買，目標價120美元，估計未來3年，阿里股價會升超過50%。其實近日多間券商已經先後出報告唱好阿里，咁就梗係啦，阿里9月上市後，只係初段有些少反覆，之後升番，早幾日升近100美元，個勢咁好，唔唱好就怪。