田少因為講真話而被中央搣柴，唔少人都戥佢唔抵；雖然田少話明2017年唔去馬，但好多人繼續支持佢下屆選特首。
自由黨創黨主席李鵬飛噚日喺港台節目上，同現任自由黨主席周梁淑怡同場，飛哥席間突然大爆，「佢（田少）曾經諗過㗎（選特首）」，嚇到周梁即刻話冇聽過喎。
飛哥繼而澄清講緊嘅係唐英年仲喺自由黨嘅時代，鬆一口氣嘅周梁笑笑口話，十年前嗰啲我唔知呀！
兩位主席噚日喺節目上對自由黨嘅發展唔太啱嘴形，周梁話自由黨應該喺建制陣營走中堅中立路線，飛哥卻叫自由黨趁機檢討路線，例如係咪再繼續做建制派，事關「建制派都唔承認佢哋係建制派」。