小弟成日流連各大網上討論區，對唔少網絡潮語都視之為常，本來亦以為好多香港球迷都識，但原來唔係！就好似早幾日同同事講起4-4-2-4，原來有人唔知係咩嚟，趁曼市打吡前夕，教大家幾個同曼聯有關嘅網絡潮語。
先講咩叫「4-4-2-4」先，其實呢個係寸曼聯黑哨，獲球證偏幫嘅用語。4-4-2係足球陣式，亦係曼聯以往最常用嘅陣，至於最右邊嘅4就係指球證(圖)、兩個旁證同埋第4裁判，寸曼聯一場波打多4個。由於上季曼聯冇再受球證眷顧，4-4-2-4呢個字都沉寂咗一排，直至上場對車路士之後，又再次成為熱門潮語！
之後就到「魚拉突」，每逢曼聯輸波，唔少非曼迷都會喺討論區上留言：「魚拉突！啪啪啪！」旨在攞景贈㷫。魚拉突起源自香港曼迷租巴士慶祝愛隊奪冠，喺馬路上，曼迷們先一齊大叫United，再連拍3次掌，由於United嘅讀音聽落同魚拉突嘅讀音好似，所以呢3隻字就流傳落去，成為揶揄曼聯嘅必用字。
「英超曼聯又輸一場」出自無綫體育主播馮堅成，係佢上季喺新聞報曼聯輸波時嘅說話。由於曼聯上季成績差，真係輸完一場又一場，所以每次曼聯輸波，呢個馮堅成嘅cap圖都會喺網上瘋傳。曼城有咩潮語？有時網民會寸曼城係金錢球隊，索性幫球隊個「曼」字加個偏旁，叫佢哋做「鏝城」。
文：咖喱