香港變天，所有嘢都好似唔多對路，致令那些集體回憶倍添重要。好多七八十年代嘅歌手，好似鄭敬基、杜德偉咁，出番嚟唱都仲咁受歡迎，連張德蘭都出番嚟唱電視劇主題曲，就知香港人幾咁懷念以前嘅日子。不過最觸動到龍叔叔嘅，肯定係陳慧嫻回歸樂壇，30年前剛出道，人氣高到可以同校長、哥哥平分十大勁歌金曲春色，呢個儍女就係靠pure食糊。陳慧嫻30周年演唱會《Back to Priscilla》DVD已推出幾個禮拜，龍叔叔又係忍手唔買，等剛上市嘅藍光版先出手，全因今次係Priscilla入行30年以嚟，首次推出高清影碟。
畀完錢Andy，喺返屋企嘅巴士上，已急不及待拎隻碟出嚟端詳，望住一堆熟悉嘅歌名，《花店》、《夜機》、《去吧》，腦內自自然響起優美旋律，禁不住喺心入面唱番晒出嚟，勾起晒龍叔叔那些年嘅拍拖回憶，甜蜜激情嗌交到分手，百感交集，差啲以為自己拍緊陽光檸檬茶廣告，只爭在冇鍾麗緹喺背後拍我：「乜咁啱嘅？」
回憶總是美好的，演唱會一起首，唔係大路嘅勁歌熱舞畀觀眾熱身，而係串起幾首剛出道時嘅慢歌，《癡情意外》、《Love Me Once Again》、《與淚抱擁》等全部經過重新編曲，快慢變調、加入大量adlib等，新意是有，不過好似龍叔叔咁嘅老歌迷，想重溫慧嫻昔日金曲味道，難免感到有啲失望囉。
BD碟喺聲畫上，算係目前港版演唱會最高規格，24bit/96kHz聲軌，再加銳利到有啲過份嘅畫面，毫無疑問係極具水準嘅製作。年近五十嘅慧嫻，好努力咁又唱又跳，好幾幕嘅舞蹈都編排得相當唔錯，好似大幅加強節奏感嘅《凌晨舊戲》，大玩椅上舞，勁有電影衝擊感，唱《飄》時的迷幻感，展現咗歌者美妙嘅喉底靚聲，及至翻唱陳奕迅嘅《1874》，居然唱出另類悲壯情懷，呢幾首歌令龍叔叔最為印象深刻。
去到中段，沒有過度求變的編曲，好多歌登時啱晒feel，《心滿意足》、《幾時再見》等一連串歌曲明顯演繹更得心應手，去到尾聲嘅《戀戀風塵》，放盡聲浪嚟嗌咪，簡直係演唱會高潮位，望住慧嫻BB唱到淚流滿臉，龍叔叔都忍唔住眼濕濕，最後以《儍女》作結尾，音樂甫響起，現場觀眾齊齊跟住唱，氣氛好到不得了，好似個個都唔捨得演唱會完結咁。睇完兩個半鐘頭演唱會後，龍叔叔明白到，陳慧嫻希望以新姿態回歸樂壇，唔單止剪咗個短金髮look，就算唱金曲都要加入新編曲，儘管唔係大家聽開嘅懷舊味道，但聽到慧嫻令人懷念嘅歌聲，仍然係值得支持呢位童年時嘅偶像。
意猶未盡睇埋making of，先知原來cut走咗《千千闕歌》，仲有同學友嘅世紀kiss等場面都冇埋，係有啲可惜，不過見到素顏慧嫻努力排舞練歌，又點捨得責怪佢呢。
簡介：
幾十歲老宅男，聽歌煲碟打機無一不癡，一生最大成就便是家中收藏幾千隻碟，假日只愛潛伏家中煲碟，親情跟愛情也拋諸碟後。
潘紹聰X柳俊江
星期一至五 晚晚「搵鬼睇」
http://hk.apple.nextmedia.com/horror