周日沙田八草兩泥賽事，草地用C跑道，睇番最近9月27日同一移欄賽果，三場1000至1200米賽事之頭馬都係擺前走，其中「添歡笑」更加係一放到底，反而1400或以上賽事，頭馬全屬居中後上馬，好似「有綵」、「駕喜」及「喜勁駒」都係早段留守尾叠，所以短途要揀前置馬，中距離就要吼後上馬。
今戰列陣馬中，頭場「太陽辰」熱身後跑番唯一贏馬路程C欄1400米，有力替馬房建功。另外，尾場「一哥」跑田C欄一次即勝，亦係全場唯一贏過C欄嘅參戰馬，憑較佳場地性能可食尾糊。
至於泥地方面，今季兩場泥地日賽頭馬「勁綵」及「輕彈錢笑」都係守前四位入直路建功，五場「霸氣」及九場「控制者」等擅跑泥地之前領馬可以優先留意。