今日香港無處不談佔中，去到馬場想話刨馬贏錢啫，都周圍聽到佔中反佔中嘅評論、爭辯、大駡，大概綜合言之，愈係有地位有錢之人，愈係媽叉佔中三子搞搞震及鬧大學生細路哥唔識世界，年紀大者亦多數大駡佔中人士阻街阻塞交通，在此場合，左丁山只係想賭馬啫，佔中反佔中在甚麼場合講，恐怕都有傷和氣，最好就係各自表述意見，你有你在「蘋果」賣廣告譴責警察暴力，我有我在「星島」刊告白多謝警察維持秩序。
睇「明報」李先知專欄話香港醫學會董事會因為兩派意見紛紜，有會董大動肝火，會長史泰祖醫生感到好痛心云云，其實醫學會理應係專業性組織，最應保持政治中立，不應就政治事件表態，否則挺梁醫生（如周伯展等）必會與較年青醫生決裂（如聯名刊登廣告支持佔中嗰一班，據知大多數係年青一輩醫生），唔通香港醫學會要一分為二咩？其他專業學會亦作如是觀。
呢日在馬場就撞到一位年輕公務員，佢仲係紀律部隊㖭（非警察），佢話呢排好悶，跟父執輩到馬場散心，問佢點解咁悶，大學畢業升正做公務員，不再是合約僱員，遠離14K（即萬四蚊一個月），直情有咗鐵飯碗啦，有乜咁悶？佢話：「你有所不知，我地部門聽慣命令，必須服從，我咁嘅年紀嘅公務員，好多支持佔中，有啲同事放工後，剝咗制服就去金鐘靜坐，但一眾上司、大老闆就鬧啲學生破壞法治，違法違紀。我唔去金鐘靜坐，更唔敢去旺角，費事表態，老闆前日竟然讚我乖，話我有前途，我幾乎想大喊一句，我要真普選呀！講真，照我所知，啲政府年輕公務員，合約僱員對CY絕無好感，對目前政府政策好失望，大家只係為咗唔錯嘅薪水，做好呢份工咋。」梁振英真係本事，上台兩年幾就可以分裂咗公務員、分裂咗專業人士、分裂咗老年青年、分裂不同收入階層，又指體育界宗教界對經濟無貢獻，佢位新聞統籌專員及特首辦心戰室人員都唔知搞邊科，簡直貽笑國際。左丁山拍吓呢位還算年輕嘅公務員膊頭：「算也罷，香港仲需要你地做好份工，維繫社會運作及穩定！」公務員話：「我會㗎，每晚抱住個女，我就知道培育下一代擔子幾重，我又擔心到女兒長大之時，香港唔知會變成點，你話呢？」