婚姻有所謂七年之癢，股場又何嘗唔係？七年前嘅10月30號，正正係恒生指數創出歷史新高之時，當日恒指收報31638點，即市更高見31958點，𠵱家望番呢個數字，唔多唔少都有啲心癢癢。
試問有邊個知道，原來嗰日就係同股市斬斷情絲嘅好日子呢？只怪自己唔係時任總理溫家寶肚入面條蟲，唔知佢喺幾日之後，就拆散港股同直通車呢對愛侶。
可憐嘅港股大受打擊，一直由山頂碌到落山腳，其間仲經歷金融海嘯洗禮，直至2008年10月，恒指先至喺10676點見底，直通車愛人不見了，剩低嘅只得一大籮蟹貨同好多殼眼淚。
以為七年前遇到直通車壞情人，點知七年後又遇到股場騙子滬港通，半年前講好咗共諧連理，𠵱家竟然玩失蹤，究竟幾時先肯現真身？