佔領運動事隔一個月仍然膠着。早前一直希望拉攏泛民、建制以至中央「埋枱傾」，但因為被指太溫和，仲被迫擱置自己提出嘅排序複選方案，表明對政制意興闌珊嘅公民黨湯家驊Ronny，既然專注民生冇眼睇政改，閒餘時自然打吓波輕輕鬆鬆好過。
無緣單獨談政改
話說喺剛啱啱過咗去嘅周日，有人就見到Ronny喺深圳西麗湖打golf，最令人議論紛紛嘅係佢竟然「巧遇」港澳辦主任王光亞，甚至喺更衣室gathering「密會」，惹嚟唔少人遐想，唔通呢次係悉心安排嘅「巧遇」，密謀喺更衣室翻生湯狀個溫和方案？
八方噚日搵Ronny求證，佢話嗰日去打golf，真係咁啱得咁橋撞到王光亞，佢原本真係打算捉住對方問政改，但王同行仲有另一人，由於唔知對方乜頭乜路，所以唔敢亂問嘢，寒暄兩句就閃人。
但之後喺更衣室，確實再撞到王，一心諗沖完涼之後搵對方傾兩句，點知出來時王光亞已經走咗咯！
其實政界一直流傳佔領運動爆發之後，王光亞一直坐鎮深圳監察香港局勢，所以喺深圳撞到對方，未算好出奇。