今周熱話係體育嘅貢獻？我唔係學者，亦唔係經濟達人，當然唔敢亂畀意見。今夏英超喺轉會市場花咗8.35億英鎊，而新界東北新發展區？政府預算投資6億港元，只係英超轉會費總和10分之1。以今周曼市打吡為例，曼城「金主」阿布扎比集團係世上最有錢嘅投資集團，近5年投入超過4億英鎊買人，又有成績，證明足球可以吸引到大財團投資。但點解港超聯得到嘅資助可以少得咁可憐呢？我估問題在於一個地方嘅領導者，到底用咩角度去睇體育。如果體育只係一個爭取出鏡同可以同運動員上台合照嘅機會，平時化身「礙事」部、漠不關心，將支持體育變得口號化嘅話，體育梗係冇機會對經濟作出貢獻啦！
講番今周比賽，曼聯（圖）上周逼和車路士，球迷當然開心。唔單止因為逼和1哥，更因為曼聯表現出今季最好防守力。希望雲高爾未唔好再用3人防線，曼迷真係食多多驚風散都頂唔到！今個星期曼市打吡，曼聯有朗尼復出，呢位隊長過往對曼城成日入波，對番死敵應該有貨交。相反曼城主力施華有傷，未知踢唔踢得，如果唔可以上陣，對曼城影響就大喇！而且曼聯後防又穩陣咗，應該有力一戰，作客可以打和曼城！
LULU
不懂踢波愛睇波