西甲1哥巴塞隆拿上周喺國家打吡首次經歷聯賽輸波滋味；本周中，意甲1哥祖雲達斯嘅聯賽不敗金身，亦被打破，作客爆冷0:1不敵熱拿亞，最慘嘅當然係門神保方，第500次代表祖記喺意甲上陣，仲戴住個印有「500」字樣嘅隊長臂章，點知失守之餘仲要輸埋場波！
幫祖記南征北伐咗13年嘅保方，周三作客熱拿亞，係佢第500次幫祖記喺意甲上陣，球會賽前為歌頌呢位門神，特別送咗個印上「500」字樣嘅隊長臂章，等佢喺周三場波可以戴住呢份榮耀把關。點知唔戴好過戴，戴完反而丟架。祖記呢場波射咗16腳得5次中龍，一直都無法打破僵局，正當以為悶和0:0收場，保方都叫做保住冇失波嘅金漆招牌，但補時4分鐘，成場波都冇乜攻勢嘅熱拿亞，靠一次突擊由後備上陣嘅安東連尼門前掃入，爆大冷絕殺老婦人，令到保方要以輸波度過佢嘅500場里程碑。
熱拿亞完場前得手
呢個失波，我求大俠認為呢位隊長都有啲責任。雖然唔可以怪晒佢，皆因倒戈嘅馬特尼傳波入中間畀安東連尼時，完全冇人mark住後者，保方一定要出迎撲走個傳送，只係時間計得冇咁好，俾球波漏過咗，但最大問題係成條防線喺今次反擊好懶懶閒同唔夠集中，作為隊長，保方似乎有啲責任提醒隊友喎！
保方賽後冇講咩，但教練艾基利竟「賴地硬」，話熱拿亞嘅球場因早前水浸，草地有損毀，唔係好適宜比賽：「今次個場真係好閉翳，根本唔符合比賽資格。不過，我哋其實踢得好盡力，但喺完場前30秒輸球咁嘅波，證明我哋未夠成熟。」
羅馬贏波追至同分
祖記輸波後，俾同日主場2:0輕取切塞納嘅羅馬，追到同得22分，只係因對賽成績較好，先至未失榜首；至於AC米蘭作客1:1逼和卡利亞里，連續兩場聯賽都失分。
識睇，一定係睇足英台【英波Live】：
http://soccer.appledaily.com
http://bit.ly/engballlive