生面口股仔近期殺得性起，其中可留意最新貨源已落在大陸水嘅皇冠環球（727）。呢條水一向以狼虎見稱，以其成本價都要挨近8毫邊估計，單以佢哋最保守計嘅一個開做目標，已經值1.6銀，不妨搭番轉高速快車。皇冠環球前身係卓越金融，股權於年初易手予皇冠置地集團，後者再於上月向另一原股東收購埋股份，令手持股權增至72.7%水平，成為貨源極度歸邊嘅底蘊！
明知貨源可貴，連月都見唔少大陸水沿途不斷收貨，但似乎點收都唔夠。集團上月亦乘住天時地利人和，一次過批售3.3億股新股，每股作價0.7元，而配售代理亦同為安排股權易手嘅代理長江證券。長江證券出名多大陸水幫襯，唔使多講成批貨自然被火速認購，平均每股成本應近8毫邊，所以家陣股價連大陸水初始目標都未到。
新母公司皇冠置地專事投資綜合性商業物業，入主後先會執一執公司家陣喺酒店及寫字樓投資業務，並強調會按需要採納新投資策略，以回應瞬息萬變市場趨勢，把握合適機會咁話，所以今次批股集資2.3億銀資金，相信好戲會在後頭。呢條大陸水幾經辛苦後先取得呢批新貨源，故一定會有大時代上演，好好埋位等睇精采好戲矣。
古道祥
本欄逢周五刊出