平民如你我閒時只能靠Facebook發聲，邊似得啲球壇領隊咁高級，可以出本書數吓新仇舊恨、陷死敵於不義？今期除咗有前曼聯領隊費格遜推出自傳更新版外，前法國主帥杜明尼治（圖）周三亦有自傳出街，當中仲數晒前麾下球星施丹、安歷卡同列貝利，連英超車路士領隊「寸王」摩連奴都敢挑戰！
杜sir喺書中力數球員自私、獨食同想紅，危害國家隊形象，連一向形象甚好嘅球王施丹都未能倖免。2010年南非世盃外圍賽，法國靠亨利嘅問題手球驚險淘汰愛爾蘭晉級決賽周，杜帥力撐亨利為國家犧牲形象；但施丹06年世盃決賽以頭槌撞向意大利後衞馬特拉斯，杜sir就狠批施丹只係為個人利益而戰。佢仲嘲諷摩帥當年做巴塞助教只係擔任雲高爾繙譯，寸摩帥繙譯出身：「繙譯總係自以為是，呢個係佢哋通病。」
識鬧一定出自傳鬧，個人就非常期待寸王出自傳還擊喇！
文：呂晨