9.28警方放催淚彈清場，好多人仍氣在心頭，噚晚約8點半雨傘廣場又有人放蛋，中招嘅係長毛，當時佢做網台D100節目期間小休，如常同市民合照，被懷疑為古惑仔嘅人掟蛋，掟中幾隻，同長毛影緊相嘅市民以身掩護同樣中蛋。
長毛指掟蛋者冇嗌口號、冇戴口罩，見到樣，向長毛講：「你掟得蛋我唔掟得？」掟蛋後閃咗。長毛指幾個肇事者應該只係古惑仔，正所謂窮寇莫追，所以只回敬一句：「撈唔起嘅古惑仔，走啦，返屋企啦！」
長毛話有市民報料，有個男人在場指揮，長毛後來報警，「我喺立法會出面俾人掟蛋，點知佢係咪叫我唔好返嚟？」詳情今日再講。