一場雨傘運動，見證中外演藝界嘅名人，條腰骨究竟有幾硬。《華爾街日報》噚日為香港演藝界「大清算」……噢，唔係，係「大點算」至真。佢哋喺一篇題為《Chow Yun-Fat Beats Jackie Chan（周潤發擊敗成龍）》嘅文章，大讚發哥明知會被大陸封殺，仍然敢於爭取民主，相反成龍就係北京嘅辯護者（Beijing apologist），只為共產黨發聲。雖然論功夫或者係成龍勁啲，但論講真話嘅勇氣，發哥輕易K.O.成龍。
「賺少啲」贏盡民心
其實呢篇文章主要引述發哥早前接受《蘋果日報》訪問，批評政府做錯咗，「如果政府再用暴力手段對付學生嘅時候，你令香港市民好反感。佢哋個訴求好清楚啦係咪？點解你成日叫人袋住先，你唔可以接納一個方案，係政府你袋住先？」之後傳媒再問佢，如果內地因此封殺佢，如何是好？發哥淡然道：「咁咪賺少啲囉。」贏盡民心。
至於成龍，文章形容佢「長期親中及批評民主」，喺今次爭取民主運動上，市民支持嘅係發哥而唔係佢，所以發哥「擊敗」成龍。同文亦提及，劉德華同何韻詩都有支持今次民主運動，仲話阿詩有八成收入嚟自內地，即使面對封殺「恐嚇」都照樣發聲，而藝人嘅表現代表咗「本地很不滿意北京的管治」。
八方查過資料，成龍曾經喺10月初喺微博回應佔中，強調對傳媒報道話佔中造成或高達3,500億嘅經濟損失好着急，「沒有強的國，哪有富的家」，話大家應該「一起努力，回歸理性，面對未來，愛我們的國家，愛我們的香港」。不單冇讚佔領運動和平，亦未支持學生有理想；成龍點解被擊敗，香港人，你懂的！
李八方
mailto:[email protected]