金管局總裁陳德霖認真陰功豬，佢坐咗呢個位5年，好日都冇乜嘢講，每次一講，前總裁任志剛又講，任總德高望重，次次都輕易搶晒陳德霖鏡，真係夾都冇咁啱！
雨傘運動持續超過一個月，陳德霖呢個星期初跟貿發局飛去法國巴黎出席招商活動，已經諗定點樣回應有關雨傘運動嘅提問，喺當地時間星期二同一班香港傳媒做訪問，因為時差嘅關係，佢篇訪問噚日見報。咁啱得咁蹺，任總忽然喺前日發表聲明勸學生回頭是岸，變成又係噚日見報。
坐鎮金管局16年 深入民心
用新聞搜尋系統Wisers搵搵，噚日有19篇文章報道任總與陳德霖對雨傘運動嘅睇法，當中有9篇以任志剛為標題，其中3篇條題有埋陳德霖。以呢個情況去睇，任總今次又成功搶咗陳德霖風頭了。
點解話「又搶」呢？如果大家心水清嘅話，就會發現今年2月，任總以中大學者身份撰文建議廢除調控存款準備金率，翌日陳德霖就發表一篇回顧離岸人民幣十周年文章。7月中，陳德霖原本計劃好有個專欄講樓市，點知任總一篇雜誌訪問早佢兩日出街又係講樓市。
都係嗰句，陳德霖好日都冇乜嘢發表，每次準備有嘢講，任總咁啱就搶先講咗類似題目，今次陳德霖老遠喺巴黎講雨傘運動，任總又出稿。
任總有「金融沙皇」之稱，強勢坐鎮金管局16年，即使退休5年，又講過「不在其位，不謀其政」，但係說話依然極具份量，並非浪得虛名，加上陳德霖作風低調，上任後多數出席立法會會議或忽然出稿評論孖屐，難免冇任總咁深入民心。
李華華
mailto:[email protected]