珠海控股（908）係珠海市上市嘅旗艦，等俾湊大就梗㗎喇，嚟緊日子，喺港珠澳大橋同橫琴嘅concept情況底下，新發展嘅地產項目，食到應一應，珠控肥仔水。
珠控除咗原有客貨同度假村業務，家陣兼搞埋珠海高爾夫球場同地產項目。當中，旗下嘅第一個高爾夫球別墅翠湖第一期，應該已經推售。
食正橫琴重點發展概念
報載話，第一期項目194套別墅，其中嘅120套已經內購，單係首期，若果全數套現，就高達21億元。以珠控所佔權益計，潛在回籠，都去到13億元，珠控家陣總市值，不過18億元咁大把。仲要係咁睇，嚟緊港珠澳大橋通車，必然激活珠海經濟動力，翠湖其餘分期，更加值租，珠控肥仔水。
珠控上年同一間國企訂立協議，合作發展橫琴航運中心綜合體。呢壇製作，唔止有橫琴concept，更實在係，橫琴係繼澳門後，港珠澳另一個阿爺重點開發嘅大project，若果順風順水，亦會係另一個中線搵真銀嘅財路。
又珠控有旗艦優勢，上邊所講嘅，全部靚仔project，大股東珠海九洲控股啱啱喺上星期增持珠控366萬股，真金白銀向珠控投信心一票，珠控遲早俾阿媽湊到肥肥白白。
咪扯咁遠，珠控今年上半年純利增長17%，到3,320萬元，喺半年度後，集團公佈，旗下島嶼航線，喺今年頭七個月嘅乘客量，創咗新高，客運keep住好景，已經支持今年經營業績。到咗明年度，地產項目開始反映，珠控進入增長爆炸期，預測PE得5、6倍，地區旗艦股當中，冇乜邊隻有珠控咁平。
買珠控，現價（1.28元）翻半番到1.9元計數，明年度PE都係得8倍。
錢雋
細價股專家
本欄逢周二、三、五刊出