球員喺操練時表現差到冇朋友，究竟應該得到乜嘢懲罰，罰錢定停賽？蘇超球會巴特里就諗到條絕橋，罰表現最差嗰位球員着住套肌肉衫操練，變身做日本漫畫《進擊の巨人》個巨人。至於邊個球員咁唔好彩中招，咪係英冠哈特斯菲爾德借將積卡路爾囉。
巴特里早有前科
家陣喺蘇超排第8位嘅巴特里，周二備戰翌日對些路迪場蘇格蘭聯賽盃8強戰嗰陣，訓練場出現咗一個「全身赤裸」嘅肌肉男。原來係佢哋嘅愛爾蘭後衞積卡路爾，佢亦唔係冇着衫「吊吊揈」，只係笠咗件肌肉衫箒。據講由於呢位23歲借將喺上個禮拜操練時表現未如理想，仲要係最差嗰個，於是領隊阿倫雅治波就罰佢着肌肉衫練習，等佢反省吓喎。
睇落積卡路爾仲着埋原本嗰套練習衫打底，所以佢件肌肉衫上身之後，背面條拉鏈根本拉唔埋，直頭有逼爆嘅效果，成個日本漫畫《進擊の巨人》裏面嘅「超大型巨人」咁。不過，佢操練嘅時候仲四萬咁口，似乎好享受，咁又難怪嘅，佢本身唔係大隻，家陣有機會做筋肉人，梗係Happy啦，睇嚟阿倫雅治波下次要罰佢着芭蕾舞衫至得嘞。
着芭蕾衫小將sosad
唔係我求大俠老作㗎，查實今次唔係巴特里第一次用非常手段。舊年12月尾，20歲蘇格蘭小將加利費沙（左圖中）因為做咗每周操練最差球員，結果被迫喺之後嗰課操練着住套女裝芭蕾舞衫，搞到佢成程都黑口黑面，仲要隊友卡爾根上前安慰佢㖭。
識睇，一定係睇足英台【英波Live】：
http://soccer.appledaily.com
http://bit.ly/engballlive