佔鐘區噚日有位稀客，商台首席智囊陳志雲現身，hehe，咪以為佢專登去搵Alexter先得㗎，查實佢只係同節目製作人員一齊訪問留守學生。志雲大師話，呢次係佢首次認真喺佔鐘區由頭到尾睇一次，感覺震撼、感動，大讚現場秩序井然，同第二啲城市或國家類似嘅抗爭行動好唔同，顯示咗港人嘅高質素，真心覺得運動係愛與和平而非恨與暴力。商台續牌變數多，志雲大師咁講，算係藝高人膽大，佢話佔領一個月，最令佢感動嘅原來係學聯同佔中三子叫停公投，「勇於承認呢個決定未係咁正確，我覺得係值得感動」。至於運動未來去向，佢話退有時，進有時。