股評人徐燦傑（Prof.J）上周自己話，因幫馬會喺某本雜誌寫文章，獲馬會提名做Racing Member（賽馬會員），仲話全港得七千幾名賽馬會員，有人曾經為會籍犯法云云。係人都知做賽馬會員難，難就難在，好難分別搵到兩名遴選會員（Voting member）提名同附議，遴選會員全部係馬時亨、夏佳理等社會賢達。因此，好多馬會會員對馬會咁易畀一名股評人做會員好有意見。
馬會對呢件事冇評論。不過，馬會除咗有Racing Member，其實仲有一款叫做Racing Club Member，雖然只係差一個英文字，但兩款會籍差好遠，後者叫做競駿會會籍，年滿18歲就可以申請成為競駿會會員，毋須由遴選會員提名同附議，不過都可以同人講係馬會會員嘅。