公仔箱嘅黑絲江（江美儀）成為唔少宅男夢中情人，政壇都有位黑絲卿，噚日「艷」壓元秋同葉劉。話說卿姐噚日以一身黑衣亮相立法會，本來以此衣飾哀悼香港普選已死唔算特別，亮點卻係佢長裙上嘅黑衫原來係喱士see through，結果呢個「黑see」look惹嚟唔少注視目光，卿姐亦政治正確，帶埋黃色外套撐雨傘運動。
黑see卿一出，露出少少肉，元秋同葉劉都被比下去。查實葉劉噚日經過悉心打扮，化作人肉藍絲帶喺立法會周圍行，事關佢連裙帶鞋兼手袋同環保袋都係全藍，只係外套竟然係黃色。葉劉話黃絲帶行動搞到佢着黃色衫都要避忌啲，專登搵番啲藍色嚟平衡吓。
至於表明想捐錢畀警察嘅元秋，啡灰外套襯橙黃色裙之餘，冇忘記繫上藍絲帶。冇see through嘅佢轉為show腳，仲指點八方低炒會影得佢靚啲，唔好頭大身細咁核突喎。