立法會有個外訪團上個月14至21號去咗芬蘭、挪威同丹麥考察，了解當地多黨制、自治區經驗等。隨團嘅工聯會麥美娟噚日喺簡報會上叻唔切，自爆喺芬蘭時問人哋點睇拉布，發現人哋係冇拉布、響鐘點人數、限制發言次數等，話人哋大部份事項都係傾出嚟，明顯想藉外國勢力暗寸泛民！
外訪團團長、民主黨劉慧卿即刻反駁麥美娟，話人哋實行多黨制，有政黨輪替，凡事使乜去到咁盡。自由黨鍾國斌就話，董伯伯年代都試過八黨聯盟，值得港府考慮，仲話芬蘭自治區Aland有自己嘅議會同制度，可見「最先講（一國兩制）嘅唔係鄧小平」。八方想提醒佢一句，田少珠玉在前，小心禍從口出呀！