豬肉股萬洲（288）8月才剛上市，點知集團日前公佈中國附屬公司雙滙的第三季業績，表現已經大幅走樣，由第二季時盈利仲升緊16%，瞬即在第三季變為跌16%，真係「翻臉快過翻書」，有力問鼎史上最快走樣的新股。芬佬朋友認為，雙滙在7、8月的出貨量仍然正常，即問題主要是發生在9月，情況匪夷所思。
萬洲星期一股價大跌20%，管理層當日舉行電話會議解畫，把業績唔理想，歸咎於產品的結構調整，表示由於期內淘汰咗一些低檔、唔太賺錢的肉製品，但準備推出的高檔產品就延遲了上市，故才令銷售出現真空期。
海迪唔明，公司都未肯定新產品會唔會成功，咁快就cut走舊產品，而同時間公司明顯無產能限制的問題，呢個做生意策略，實在令人費解。更搞笑的是，萬洲聲稱淘汰咗低利潤產品，但第三季利潤率不升反跌。會唔會係期內豬肉價格急漲的影響？可能係。
不過萬洲中期業績時話自己趁低吸納咗好多豬肉㗎喎！唔通咁都幫唔到手？
市場傳聞，雙滙最近的產品在內地渠道庫存出現積壓問題，是市場競爭劇烈咗，定係公司上市前加大了力度出貨呢？聞說以上疑團，投資者在電話會議都有問，不過管理層問非所答，不斷repeat一些line-to-take，拍晒心口話第四季業務會反彈，但對投資者更了解公司具體情況幫助不大。
萬洲近日已四出參加會議，下月初又搞Roadshow，圖力挽狂瀾。但海迪認為，要修補市場信心，比起馬不停蹄地見人，長期保持credibility更重要。
海迪