冠軍騎師潘頓近期做了盃王，由前次賽事開始到呢晚為止，佢一連三戰各捧一盃，包括公益金盃「贏到爆」、沙田錦標「軍事出擊」同呢晚第七場三班1200米愛爾蘭錦標之「大寶藏」。
當中灰馬「大寶藏」乃新世界地產兼周大福珠寶老闆鄭家純之愛駒，上仗用羅理雅後上不及屈居亞軍，今場用番唯一贏馬配搭潘頓，結果以大熱身份順利補中，帶挈葉楚航馬房今季首度捧盃，一吐悶氣！
同場二、三名分別係「好愉快」及「百戰百勝」，前駒落飛搏失，郭能呢晚繼第五場「飛哥」後再做二奶，而蔡廐「百戰百勝」雷神棄騎用杜利萊，臨門追過「愛的呼喚」得第三，造就一連三屆愛爾蘭錦標都有蔡廐馬上名，至於上仗跑第二的「愛的呼喚」，用番谷草贏馬拍檔巫斯義，表現反而差咗，只得梗頸四，此駒近八戰全入二至五名不等卻未嘗一勝，馬主郭富城從外地趕返港督師，又一次敗興而歸，今季仲未喺凱旋門出現過。