「食家」蔡瀾對食物有要求係人都知，連央視都要搵佢做飲食節目《舌尖上的中國》嘅顧問，就知佢有一定嘅江湖地位。內地老牌醬油品牌老恒和（2226）噚日就宣佈，聘請蔡瀾做公司榮譽顧問。
蔡瀾透露，早排老恒和主席陳衛忠邀請佢去湖州總部參觀，佢見到一望無際、「好似兵馬俑」咁多嘅酒埕，對米酒嘅香味印象非常之深，大讚公司生產過程細心、固執，仲話自己唔係隨便應承做顧問。蔡瀾今次同老恒和以合約方式合作，但冇透露具體金額，嚟緊會幫公司研發不同新產品。
在場嘅老恒和第二大股東、9月高價入股嘅陳志雄伺機賣藥，指蔡瀾每次出國，都要帶支老恒和豉油跟身喎。佢又話，自己以溢價逾18%入股老恒和，亦係因為好鍾意公司嘅產品，「我食唔番點算呀？你試一次就知」，真係營銷高手！