雨傘運動仍進行，狼英要坐鎮香港，於是就叫財爺曾俊華呢個星期代替佢飛去歐洲出席貿發局搞嘅活動，財爺前日喺巴黎出席論壇時，已經遇到當地留學生舉傘示威，佢今晚喺英國倫敦應該都會遇到舉傘學生，因為有學生已經喺facebook（fb）設有「曾俊華訪英，同撐傘發聲」嘅專頁，準備到時好好歡迎財爺喇。
呢個專頁設計得幾可愛，設計者用咗品客薯片嘅招牌鬍鬚公仔，加副圓框眼鏡，就變成花名叫「鬍鬚曾」嘅財爺，呢個公仔都算得意，照咁睇，財爺喺設計者心目中嘅形象都唔差，起碼唔係搵隻邪惡公仔去惡搞佢，換轉係原本去嘅狼英，呢隻公仔肯定唔一樣。
財爺呢個行程都幾急，前日喺巴黎，今日由米蘭飛去倫敦，之後就回港了。