季初賽事嘅高潮，當然係國際賽，日前「友瑩格」及「軍事出擊」分別勝出精英碗及沙田錦標，稍後肯定備受注目。不過對於一啲年輕新星嚟講，12月嘅國際賽難度太高啦，可能要明年嗰屆先至係合適嘅挑戰時機，今季當然先向四歲馬大賽系列進軍啦。
高達105分嘅四歲灰色神獸「和順超影」，有幾勁真係唔使多講，本月12號在港初出，喺二班1400米「行」過對手勝出，潘頓既無落鞭，甚至冇騎過，比晨課更輕鬆，玩弄莎莎老闆郭少明隻「美麗之星」。照咁睇「和順超影」明年一月經典一哩賽豈不是贏梗？咁又未必，起碼郭少明一定唔服氣，佢家族另一駒「美麗大師」絕對唔簡單，同樣在港一戰即勝，雖然只喺三班擊敗實力平平嘅「但求上舖」，但當日孭住133磅，足足讓亞軍馬18磅，照樣拋離近兩身位，連同以往喺意大利，總共五戰四勝，擺明係質素深不可測嘅準一班馬。
「美麗大師」復課保持進度，剛周二試大閘，末段走勢非常強勁，力追另一匹惡馬「福毅」得亞軍，狀態明顯有進冇退。喺經典一哩賽之前，「美麗大師」同「和順超影」有機會響11月30日一班1600米其士盃碰頭，如果兩駒都報名嘅話，咁郭少明呢場復仇大戰，就真係好睇咯！