有人賣樓蝕完2,000萬，轉頭再拎8,000幾萬買新樓，淨係齋聽，都覺得霸氣。呢位霸氣哥，就係以「十蚊均一店」起家嘅日本城創辦人劉栢輝。
劉栢輝啱啱喺本月15號，以6,500萬元沽走件長實（001）嘅何文田半山壹號，揸貨兩年幾，足足蝕咗2,000萬元。
呢單料前日上咗田土廳，正當大家為劉栢輝肉赤之際，點知佢轉個頭，眼都唔眨，就喺噚日走去幫襯嘉華（173），拎8,578萬元買入肇輝臺6號CHANTILLY，一個超過2,800平方呎嘅中層B室，即係前稱嘉岶薈，對正跑馬地墳場嗰棟樓。
究竟點解一個人賣樓蝕完2,000萬，仲敢再揼8,000萬買樓，唯一解釋到嘅原因，係日本城真係有好多阿豬媽日日進貢，令到劉栢輝有錢冇地方使。